Luk 1 | NdeIBE | STEP | Banengi asebazimisela ukuqoqa umlando wezinto esezigcwalisekile phakathi kwethu,

Luke 1

Isingeniso

1 Banengi asebazimisela ukuqoqa umlando wezinto esezigcwalisekile phakathi kwethu,

2 njengokwedluliselwa kwazo kithi yilabo ababekhona ekuqaleni bengofakazi lezinceku zelizwi. 3 Ngakho-ke njengoba mina ngokwami sengichwayisisile konke kusukela ekuqaleni, ngikubone kukuhle lakimi ukuthi ngikulobele umlando oqondileyo, mhlekazi Thiyofilu, 4 ukuze wazi iqiniso lezinto lezo ozifundisiweyo.

Ukubikwa Kokuzalwa KukaJohane UMbhaphathizi

5 Ngesikhathi sikaHerodi inkosi yaseJudiya kwakulomphristi okwakuthiwa nguZekhariya, owaye ngowesigaba sika-Abhija esobuphristi; umkakhe u-Elizabethi laye engowosendo luka-Aroni. 6 Bobabili babeqotho emehlweni kaNkulunkulu beyilandela yonke imilayo leziqondiso zeNkosi bengasoleki. 7 Kodwa babe ngelabantwana ngokuba u-Elizabethi wayeyinyumba; njalo bobabili base beluphele.

8 Kwenzakala ukuthi isigaba sikaZekhariya siyiso esasimiselwe umsebenzi wethempeli ngalesosikhathi, 9 kwaba lizopho lakhe edliwe yinkatho, mayelana lomkhuba wobuphristi, ukuthi angene ethempelini leNkosi ayotshisa impepha. 10 Kwathi isikhathi sokutshisa impepha sesifikile bonke abakhonzi ababebuthene lapho babethandaza bephandle.

11 Kwase kubonakala kuye ingilosi yeNkosi imi ekunene kwe-alithare lempepha. 12 UZekhariya wathi eyibona wethuka wesaba kakhulu. 13 Kodwa ingilosi yathi kuye, “Ungesabi, Zekhariya; umthandazo wakho usuzwakele. Umkakho u-Elizabethi uzakuzalela indodana ofanele ukuyetha ibizo uthi nguJohane. 14 Uzakuba yintokozo lenjabulo kuwe, njalo abanengi bazathokoza ngenxa yokuzalwa kwakhe, 15 ngokuba uzabamkhulu emehlweni eNkosi. Kakumelanga anathe iwayini lanini loba yini ebilisiweyo, njalo uzagcwaliswa ngoMoya oNgcwele kusukela ekuzalweni kwakhe.

16 Uzabuyisa abantu bako-Israyeli abanengi eNkosini uNkulunkulu wabo. 17 Uzahamba phambili kweNkosi, ngomoya langamandla ka-Elija, ukuguqulela izinhliziyo zaboyise kubantwana babo labayiziqholo elwazini lwabalungileyo – ukuqondisa abantu abalungiselelwe iNkosi.”

18 UZekhariya wayibuza ingilosi wathi, “Ngilithathe ngaphi iqiniso lakho na? Sengilixhegu njalo lomkami useluphele.”

19 Ingilosi yaphendula yathi, “Ngingu Gabhariyeli mina. Ngima phambi kukaNkulunkulu, ngithunyiwe ukuzakhuluma lawe ngikwazise izindaba lezi ezinhle.

20 Okwamanje uzakuba yisimungulu wehluleke ukukhuluma kuze kufike lolosuku okuzakwenzakala ngalo lokhu, ngokuba kawuzange uwakholwe amazwi ami, wona azafezeka ngesikhathi sawo esiqondileyo.”

21 Sonke lesi isikhathi abantu babelokhu bemlindele uZekhariya sebemangele ukuthi kungani elokhu ethe nya ethempelini.

22 Wathi ephuma esesehluleka ukukhuluma labo. Bananzelela ukuthi wayebone umbono ethempelini ngokuba wayelokhu eqhweba ngezandla kodwa esehluleka ukukhuluma.

23 Izopho lakhe seliphelile wabuyela ekhaya.

24 Ngemuva kwalokhu umkakhe u-Elizabethi wathatha isisu wasezifihla okwezinyanga ezinhlanu, esithi,

25 “INkosi ingenzele lokhu. Kulezi izinsuku itshengisile uthando lwayo yasusa ihlazo lami ebantwini.”

Ukubikwa Kokuzalwa KukaJesu

26 Ngenyanga yesithupha uNkulunkulu wathuma ingilosi uGabhariyeli eNazaretha, idolobho elaliseGalile, 27 ukuya entombini emsulwa eyayithembise ukutshada lendoda eyayithiwa nguJosefa, owesizukulwane sikaDavida. Ibizo lentombi emsulwa kwakunguMariya. 28 Ingilosi yaya kuye yathi, “Sabona, wena othandiweyo! INkosi ilawe.”

29 Amazwi ayo amhlupha kakhulu uMariya wamangala ukuthi kanti kwakuyikubingelela bani lokhu. 30 Kodwa ingilosi yathi kuye, “Ungesabi, Mariya, uthole umusa kuNkulunkulu.

31 Uzakhulelwa uzale indodana, uyethe ibizo uthi nguJesu. 32 Uzabangumuntu omkhulu abizwe ngokuthi yiNdodana yoPhezukonke. INkosi uNkulunkulu izamupha isihlalo sikayise uDavida,

33 njalo uzabusa phezu kwendlu kaJakhobe laphakade; umbuso wakhe kawuyikuphela.”

34 UMariya wayibuza ingilosi wathi, “Lokho kuzakwenzakala kanjani njengoba mina ngimsulwa ngingayazi indoda?”

35 Ingilosi yaphendula yathi, “UMoya oNgcwele uzakwehlela phezu kwakho, lamandla akhe oPhezukonke azakusibekela. Ngakho ongcwele ozazalwa uzathiwa yiNdodana kaNkulunkulu. 36 Lo-Elizabethi isihlobo sakho uzakuba lomntwana lokuba eseluphele, yena okwakuthiwa yinyumba usesenyangeni yakhe yesithupha.

37 Ngokuba kakukho okwahlulayo kuNkulunkulu.”

38 UMariya waphendula wathi, “Ngiyincekukazi yeNkosi. Kakwenzeke kimi njengoba utshilo.” Ingilosi yasisuka kuye.

UMariya Wethekelela u-Elizabethi

39 Ngalesosikhathi uMariya wazilungisela waphanga waya edolobheni elizweni lamaqaqa eJudiya, 40 lapho aya khona emzini kaZekhariya wafika wabingelela u-Elizabethi.

41 Kwathi u-Elizabethi esizwa ukubingelela kukaMariya, umntwana wanyakaza esiswini sakhe, u-Elizabethi wagcwaliswa ngoMoya oNgcwele.

42 Wakhuluma ngelizwi elikhulu wathi, “Ubusisiwe wena phakathi kwabesifazana, njalo ubusisiwe umntwana ozamzala! 43 Kodwa kungani ngiphiwe inhlanhla engaka mina, ukuba ngethekelelwe ngunina weNkosi yami? 44 Ngonele ukuzwa ukubingelela kwakho kungena ezindlebeni zami, umntwana osesiswini sami wanyakaza ngentokozo. 45 Ubusisiwe lowo osekholiwe ukuthi lokho iNkosi ethe kuzakwenzeka kuye kuzagcwaliseka!”

Ingoma KaMariya

46 UMariya wathi: “Umphefumulo wami uyayidumisa iNkosi

47 lomoya wami uyathokoza kuNkulunkulu uMsindisi wami,

48 ngokuba unanzile ubuphansi bencekukazi yakhe. Kusukela manje zonke izizukulwane zizakuthi ngibusisiwe,

49 ngokuba uSomandla ungenzele izinto ezinkulu – lingcwele ibizo lakhe.

50 Isihawu sakhe sifinyelela kulabo abamesabayo, kulandela isizukulwane ngesizukulwane.

51 Uyenzile imisebenzi emikhulu ngengalo yakhe: ubachithile labo abazigqajayo ekujuleni kwemicabango yabo.

52 Uwethule amakhosi ezihlalweni zawo kodwa wabaphakamisa abaphansi.

53 Ubagcwalisile abalambileyo ngezinto ezinhle kodwa abanothileyo ubaxotshile beze.

54 Uyisizile inceku yakhe u-Israyeli, wakhumbula ukuba lesihawu

55 ku-Abhrahama lesizukulwane sakhe laphakade, njengoba wakutsho kubobaba bethu.”

56 UMariya wahlala lo-Elizabethi izinyanga ezazingaba ntathu wasebuyela ekhaya.

Ukuzalwa kukaJohane uMbhaphathizi

57 Kwathi isikhathi sika-Elizabethi sesiphelele esokubeletha wazala indodana. 58 Omakhelwana bakhe lezihlobo bezwa ukuthi iNkosi yayimzwele isihawu esikhulu bathokoza kanye laye.

59 Ngosuku lwesificamibili beza ukuzasoka umntwana, bafuna ukuthi bamethe ibizo likayise uZekhariya, 60 kodwa unina wala wathi, “Hatshi! kathiwe nguJohane.”

61 Bathi kuye, “Kakho ezihlotsheni zenu olebizo lelo.”

62 Bakhuluma ngokuqhweba kuyise bedinga ukuthi yena uthanda ukuthi umntwana aphiwe liphi ibizo. 63 Wacela isicecedu sokuloba, wamangalisa wonke umuntu ngoba wabhala wathi, “Ibizo lakhe nguJohane.” 64 Masinyane umlomo wakhe wavuleka lolimi lwatshwaphuluka waqalisa ukukhuluma edumisa uNkulunkulu.

65 Omakhelwana bonke bangenwa yikumangala okwesabekayo, kwathi elizweni lonke lamaqaqa eJudiya abantu babekhuluma ngalezizinto.

66 Wonke owezwayo ngalokho wamangala ebuza esithi, “Kambe uzakuba yini umntwana lo?” Ngokuba isandla seNkosi sasilaye.

Ingoma KaZekhariya

67 Uyise uZekhariya wagcwaliswa ngoMoya oNgcwele waphrofetha wathi:

68 “Udumo kalube seNkosini, uNkulunkulu ka-Israyeli, ngokuba izile yazahlenga abantu bayo.

69 Iphakamisile uphondo lwensindiso yethu endlini yenceku yayo uDavida

70 (njengoba yatsho ngabaphrofethi bayo abangcwele ekadeni),

71 ukusindiswa ezitheni zethu lesandleni sabo bonke abasizondayo –

72 ukutshengisa isihawu kubobaba bethu lokukhumbula isivumelwano sakhe esingcwele,

73 isifungo asifunga kubaba wethu u-Abhrahama:

74 ukusikhulula esandleni sezitha zethu, size siyikhonze singelakwesaba

75 ngobungcwele langokulunga phambi kwayo ngazo zonke izinsuku zethu.

76 Wena mntanami, uzathiwa ungumphrofethi woPhezukonke; ngokuba uzahamba phambili kweNkosi uyilungisele indlela,

77 ukunika abantu bayo ukwazi insindiso ngokuthethelelwa kwezono zabo,

78 ngenxa yesihawu sobubele bukaNkulunkulu wethu, okuzakuthi ngabo ilanga lizaphuma lize kithi livela ezulwini

79 likhanyise kulabo abahlezi ebumnyameni lasethunzini lokufa, ukukhokhelela izinyawo zethu endleleni yokuthula.”

80 Umntwana wakhula waqina emoyeni; waphila enkangala waze wavela obala ku-Israyeli.